🎶🌿 ROMARÍA DAS LETRAS NO IES DE SAR 🌿🎶

 

O vindeiro martes 24, a partir das 14:30h, celebramos no IES de SAR a nosa segunda ROMARÍA DAS LETRAS; unha tarde para compartir tradición, música, xogos e convivencia en comunidade.

A romaría estará aberta a toda a comunidade educativa: profesorado, alumnado e familias. Cada quen traerá a súa comida para participar no xantar popular e, ao longo da tarde, gozaremos de actuacións, baile galego, cantos de taberna, xogos populares e moita festa!!!

Será unha oportunidade marabillosa para convivir, celebrar a nosa cultura e crear momentos especiais entre xeracións.

💚 Agardámosvos para facer desta romaría unha festa inesquecible!!!

#RomaríaDasLetras #IESdeSar #LinguaEGalicia #ComunidadeEducativa #TradiciónGalega

📢 A EDUCACIÓN NON PODE AGARDAR

 

Nas aulas falta tempo, faltan mans, faltan recursos.
E cando faltan recursos, quen máis o sofre é quen máis o precisa.

Esta é a realidade que se vive cada día no noso centro. Unha realidade que non pode seguir sendo ignorada. Porque detrás de cada cifra hai nomes, hai historias, hai alumnado que precisa atención, acompañamento e oportunidades reais.

Non podemos aceptar que a inclusión sexa só unha palabra bonita nos discursos mentres, na práctica, non existen os medios necesarios para facela realidade. A inclusión non é unha intención: é unha responsabilidade. E esa responsabilidade require investimento, planificación e compromiso.

Cada nena e cada neno merece ser atendido, escoitado e acompañado no seu proceso educativo. Merece contar con profesorado suficiente, con tempo de calidade e con recursos que permitan unha atención real á diversidade.

Por iso, como comunidade educativa, queremos ser claras e claros:
non estamos pedindo privilexios.

✊ Esiximos máis profesorado, máis recursos e solucións reais, non discursos.

Estamos esixindo o básico: o dereito a unha educación pública digna, inclusiva e con recursos suficientes para todas e todos.

Seguiremos traballando, mobilizándonos e alzando a voz ata que esta realidade cambie. Porque o que está en xogo é demasiado importante.

✊ Porque a educación das nosas fillas e fillos non pode agardar.

A COMUNIDADE EDUCATIVA DO IES DE SAR ESIXE MÁIS DOCENTES : “A inclusión sen recursos é unha mentira"

 

Desde a ANPA do IES de Sar vimos de rexistrar un escrito dirixido á Consellería de Educación no que denunciamos a situación actual do centro e solicitamos a ampliación do cupo de profesorado.

Nos últimos anos, o instituto experimentou un importante incremento do alumnado sen que este fose acompañado dun aumento proporcional de recursos humanos e materiais. Esta situación está a provocar unha sobrecarga do profesorado e dificultades para garantir unha atención educativa adecuada.

Especialmente preocupante é o impacto no alumnado con necesidades específicas de apoio educativo, que precisa máis recursos para asegurar unha verdadeira inclusión. A falta de profesorado, as ratios elevadas e a crecente burocracia están a dificultar unha atención individualizada e de calidade.

Tal e como recolle a normativa vixente, incluída a LOMLOE, as administracións educativas teñen a obriga de garantir unha educación inclusiva, equitativa e con recursos suficientes. Porén, a realidade do noso centro evidencia unha clara falta de medios para cumprir con estes principios.

Por todo isto, solicitamos á Consellería a ampliación do cupo de profesorado ata un mínimo de 45 docentes, como medida imprescindible para garantir o dereito á educación do noso alumnado.

Seguiremos traballando e mobilizándonos como comunidade educativa para defender unha educación pública digna.

✊ Porque a educación das nosas fillas e fillos non pode agardar.

2ª FEIRA DAS PROFESIÓN NO IES DE SAR: ALUMNADO E PROFESIONAIS COMPARTEN EXPERIENCIAS

 

A ANPA de Sar, en colaboración co IES de Sar, organiza o próximo martes 24 de marzo, de 17:00 a 18:30 horas, a 2ª FEIRA DAS PROFESIÓNS, unha iniciativa que busca achegar ao alumnado e ás súas familias a diversidade de profesións existentes e facilitar un contacto directo co mundo laboral.

O evento celebrarase nas instalacións do instituto e reunirá a profesionais de diferentes ámbitos que compartirán a súa experiencia co alumnado, explicando en que consiste o seu traballo e como é o seu día a día profesional.

A feira pretende converterse nun espazo de encontro entre estudantes, familias e profesionais, co obxectivo de inspirar ao alumnado e axudarlle a coñecer distintas posibilidades de futuro.

Nesta segunda edición búscase dar visibilidade a todo tipo de profesións e oficios, desde traballos técnicos e artesáns ata profesións creativas ou vinculadas ao servizo público. Todas as profesións teñen un papel importante na sociedade e coñecelas de primeira man pode axudar ao alumnado a ampliar a súa visión sobre o seu futuro profesional.

Durante a actividade, os profesionais participantes estarán en mesas informativas e poderán realizar pequenas demostracións, o que permitirá ao alumnado interactuar con eles, resolver dúbidas e descubrir aspectos prácticos das distintas profesións.

Esta iniciativa busca abrir novos horizontes ao alumnado e fomentar o diálogo entre a comunidade educativa e o mundo profesional, converténdose nunha actividade inspiradora para os mozos e mozas.